قصيدة الشاعر شهاب الدين سعودي بعنوان “انا همشي” مجلة الفن اليوم

مفيش ف الكون مكان واسع

وبيساعي وبيطمن

مفيش ف الارض دي عاقل

واعقل واحد اتجنن

واقرب حد لينا

بعيد واكتر وش بان فرحان

مكنش جوه منه سعيد

مفيش ف الدنيا دي انسان

قلبه سليم من التجاعيد

دا اكتر حد طمنا

ف وقت الجد غاب عنا

مفيش ولا واحد اتمني

غير الجنة وعاش ف النار

مفيش ف الدنيا دي شطار

واشطر حد كان خايب

واكتر حد بينا اهتم

بقلة دم بقي غايب

بقينا وسط ناس غرب

ميشبهوناش

الامر الواقع بقي مرعب لابعد حد

لذلك ثم اما بعد

مش فارقة بنضحك ولا مكتئبين

بكانا علينا ولا ع اللي بقوا غايبين

بنسهر حبا ف الليالي ولا وجعا م اللي راح

وقلبي مازال بيجبرني اسيبك عشان يرتاح

فسمحيني. انا همشي مفيش اسباب تخليني

او افضل بيكي متمسك او اتمسك بشيء يوماتي يإذيني

انا همشي ومتأكد ان قراري مش فارق

بس معاية اسبابي

وانتي شايفة قربي غياب فمش هتحسي بغيابي

ولا هلومك علي الاحساس ولا هشوفك انانية

وربنا يعلم اني حلمت وشفتك اغلي شيء ليا

ومتمنتش غيرك حد وحبينك حقيقي بجد وربك ادري بالنية

انا همشي ومش عارف طريق همشيه ينسيني. لكن همشي عشان مفيش اسباب تخليني

او استني واضيع وقت وهكدب لو هقولك فوقت

مفوقتش لسه من حبك ولسه ف ليلي بندهلك

 انا شايفك ومش شايف ملاك ع الارض يشبهلك

وهمشي الجاي بفتكرك

كبسمة قتلت تكشرتي ف عز ماكنت عايش حزن انا مش جاي اخد اذن

انا همشي جايز بعدي ينجيني

مفيش اسباب تخليني

ولا انتي بردو ترضيلي

اعيش جنبك كما الكومبارس

واعيش حالك وتطلع درس

واكمل سكتي ف ليلي

واكون ف القصة مجني عليه

وانا واحد مفيش ف ايديه

حاجات تانية يقدمها

بنيت احلامي بإيديا

وبإيديا دي بهدمها

وبنهي الفيلم دا بوضوح

مفيش جارح ولا مجروح

مفيش ابطال ولا مشاهدين

ولا هيتم عرضه ف يوم

مفيش غير شخص كان موهوم

ان حبيبته ليها وجود وطلعت ف النهاية غياب

انا همشي من الاخر مفيش اسباب تخليني اقول اسباب.